आ माता म्हांरी है !
आ माता म्हारी है बीरा, माता आ थारी है !
आ माता थारी है बैनड़, माता आ म्हारी है !
राजस्थानी आपां सगळा राजस्थान्यां री है !
आ भाषा म्हांरी है लोगां ! माता आ म्हांरी है !
राजस्थानी भाषा सगळा राजस्थान्यां री है !
राजस्थानी देह - आत्मा राजस्थान्यां री है !
नव दुर्गा ज्यूं इण माता रा रूप निजर केई आवै
मोद बधावै मेवाड़ी मन हाड़ौती हरखावै
बागड़ी ढूंढाणी मेवाती मारवाड़ी है !
भांत भांत सिणगार सजायेड़ी आ रूपाळी है !
आ माता म्हारी है बीरा, माता आ थारी है ! !
गरब सूं गवरल ज्यूं मायड़ नैं माथै उखण्यां घूमां
चिरमी मूमल काछबो गावां, लड़ली लूमां झूमां
मीठी मिसरी आ भाषा सगळां सूं प्यारी है !
चांदड़लै री उजियाळी आ सूरज री लाली है !
आ माता थारी है बैनड़, माता आ म्हारी है ! !
वीर बांकुरां री बोली आ सेठ साहूकारां री
वाणी भगतां कवियां करसां राजां बिणजारां री
मरुधरती रो कण कण पग पग मा सिणगारी है !
बडो काळजो राखण वाळी निरवाळी न्यारी है !
आ माता म्हांरी है सुणज्यो, भाषा आ म्हांरी है !!
गरबीली ठसकै वाळी है , जबर मठोठ इंयै री
जद गूंजै; के कान ? खोलदै खिड़क्यां बंद हियै री
मत जाणीजो इण रा जायोड़ां में मुड़दारी है !
आज काल में हक़ लेवण री इब म्हांरै त्यारी है !
राजस्थानी देह - आत्मा राजस्थान्यां री है !!
मत करज्यो रे बै'म कै भायां सूं भाई न्यारा है
काळजियै री कोर है भाई आंख्यां रा तारा है
अणबण व्हो ; म्हैं जूदा नीं व्हां…मन में धारी है !
सावचेत रे टकरावणियां ! जीत अबै म्हांरी है !
सावचेत रे टरकावणियां ! जीत अबै म्हांरी है !
***
नाम लिखूंला
पैलां थां'रो नाम लिखूंला
ओजूं मुळक' सिलाम लिखूंला
म्हारै मन री सैंग विगत म्हैं
काळजियै नैं थाम' लिखूंला
रूं-रूं नस-नस थां'री ओळ्यूं
मोत्यां-मूंगै दाम लिखूंला
थां'रो तन मदिरालय लिखसूं
मन नैं तीरथधाम लिखूंला
छेकड़ दो ओळ्यां मांडूंला
ख़ास ज़रूरी काम लिखूंला
लिखसूं थां'नैं भोळी राधा
ख़ुद नैं छळियो श्याम लिखूंला
नीं स्रिष्टी में लाधै राजिंद
प्रीत इस्यी सरनाम लिखूंला
***
-
पीड़ पच्चीसी
रजथानी रै राज में , गुणियां रो ओ मोल !
हंस डुसड़का भर मरै , कागा करै किलोळ !!
रजथानी रै खेत नैं , चरै बजारू सांड !
खेत धणी पच पच मरै , मौज करै सठ भांड !!
कांसो किण रो… कुण भखै ; ज़बर मची रे लूंट !
चूंग रहया रजथान री गाय ; सांडिया ऊंठ !!
महल किणी रो घुस गया कित सूं आ'य लठैत ?
घर आळां पर घौरकां धमलां सागै बैंत !!
शरण जकां नैं दी ; हुया बै छाती असवार !
हक़ मांगां अब भीख ज्यूं ? रजथानी लाचार !?
रजथानी गढ आंगणां , रै'गी कैड़ी थोथ ?
राजा परजा सूरमां थकां मांद क्यूं जोत !?
भणिया गुणिया मोकळा बेटां री है भीड़ !
सिमरथ ऐड़ो एक नीं ? मेटे मा री पीड़ !!
पूत करोड़ूं सूरमा राजा गुणी कुबेर !
रजथानी खातर किंयां ओज्यूं सून अंधेर ?!
माता नऊ करोड़ री रो रो ' करै पुकार !
निवड़या पूत कपूत का भुजां हुई मुड़दार ?!
समदर उफ़णै काळजै , सींव तोड़ियां काळ !
सुरसत रा बेटां! करो मा री अबै संभाळ !!
निज भाषा, मा, भोम रो,जका नीं करै माण !
उण कापुरुषां रो जलम दुरभागां री खाण !!
जायोड़ा जाणै नहीं जे जननी री झाळ !
उण घर रो रैवै नहीं रामैयो रिछपाळ !!
निज भाषा रो गीरबो करतां क्यां री लाज ?
मात भोम, भाषा 'र मा सिरजै सुघड़ समाज !!
मिसरी सूं मीठी जकी…राजस्थानी नांव !
व्हाला भायां, ल्यो अबै निज भाषा री छांव !!
माता नैं मत त्यागजो , त्याग दईजो प्राण !
मा आगै सब धू्ड़ है…धन जोबन अर माण !!
अरे सपूतां ! सीखल्यो माता रो सन्मान !
मा नैं पूज्यां' पूजसी थांनैं जगत जहान !!
नव निध मा रै नांव में , राखीजो विशवास !
मत बणजो माता थकां और किणी रा दास !!
माता रै चरणां धरो , बेटां ! हस हस शीश !
खूटै सगळा धन, अखी माता री आशीष !!
मा मूंढै सूं कद करै आवभगत री मांग ?
आदर तो मन सूं हुवै , बाकी ढोंग 'र स्वांग !!
करम वचन मन सूं करो माता रा जस गान !
रजथानी अपणो धरम , रजथानी ईमान !!
गूंजै कसबां तालुकां ढाण्यां शहर 'र गांव !
भाषा राजस्थान री… राजस्थानी नांव !!
वाणी राजस्थान री जिण री कोनी होड !
होठ उचारै ; काळजां मोद हरख अर कोड !!
उपजै हिवड़ै हेत ; थे बोलो तो इक बार !
राजस्थानी ऊचरयां ' बरसै इमरत धार !!
इमरत रो समदर भरयो , पीवो भर भर बूक !
रजथानी है प्रीत री औषध असल अचूक !!
पैलां मा नैं मा गिणां आपां हुय ' दाठीक !
मरुवाणी नैं मानसी ओ जग जेज इतीक !!
***
अबखायां उलळै
अबखायां उलळै हद - अणहद ,
जबरजिना सजनां री है !
नंग - मलंगा रंग जमावै ,
ठकराई ठगनां री है !
पूजीजै हर ठौड़ कुपातर ,
जै झूठा जतनां री है !
फग फग फग फागड़दा फूलै ,
चांनणली घुघनां री है !
दुनिया दोगळियां - दोख्यां री ,
बायड़ियां - बगनां री है !
चातर चुग्गां चाटूकारां
मदछकियां मगनां री है !
पूग मसीतां ‘ मुल्लो ’ मुळकै -
म्हारी दौड़ मनां री है !
‘ जागणियो ’ दमड़ा गिण गावै –
भूख म्हनैं भजनां री है !
कोनीं कौडी काच जिस्या ई
पण डूंडी रतनां री है !
कदर ईंयै बस्ती ; राजेन्दर
फीस्योड़ा फुगनां री है !
***
आकां माथै हरयाळ्यां
आकां माथै हरयाळ्यां
सूखै तुलछी री डाळ्यां
गंगाजी नै गाळ अबै
पूजीजै गंदी नाळ्यां
थोर हंसै गमला में, अर
खेत सडै सिट्टा बाळ्यां
अबै अमूझो - अंधारो
करै झरोखा अर झाळ्यां
गिणै न बायां - बेट्यां नै
अधमां रै टपकै लाळ्यां
माथो जठै पीटणो व्है
लोग बठै पीटै ताळ्यां
आं रो कीं करणो पडसी
राजिंद, नीं चालै टाळ्यां
***
कठी स्य़ूं आयो बटाऊ
बोल ! कठी स्य़ूं आयो बटाऊ
कीं खातर के ल्यायो बटाऊ
छींया बैठ, कीं पून खाय़लै
लागै कीं तिरसायो बटाऊ
छाछ राब पाणी कीं लेयल्यै
भूखो है का धायो बटाऊ
माया मुनवारां मुळ्क्यां में
रींझ घणो हरखायो बटाऊ
भूल्भुळावां मांय अळूझ्यो
ठौड-ठौड बिलमायो बटाऊ
बिसरियो कीं घर, कीं सूं मिलणो
घर - घर गोता खायो बटाऊ
***
