सतीश छीम्पा री कवितावां

म्हारो देवता
एक देवता मरग्यो
भोत पेलां
अर खुसगी पांखं
म्हारै नेहचै री ।

अबै कोई कहाणी कोनी बणै
ना ई कोई सबद ई जुडै सबद सूं
लागै जाणै
जिग्यां ई कोनी ऊबरी
म्हारै खातर
आं सबदां मांय
अर जे ऊबरिया है तो
फ़गत थोथा विचार !

म्हैं म्हारो
थकेलो लेय
पसर जावूं

***

निढाळ होय’र
सोच री बाथां में
देखूं म्हैं
म्हारै देवता नै
उण रै भोळापै नै
अर आंख्यां मांय़
बणती एक कहाणी नै....

***

स्यात थूं मुळकै
आज रात भोत सुहावणी सी है
बायरियो बाजै
मुळकती सी धरती
होय रैयी है खांगी सी
पंखेरू नीं है अणमणा
दरखत जतावै आपरी खुसी
पानड़ा खिंड़ा-खिंड़ा’र
स्यात
थूं मुळकण लाग रैयी है.......

***

डांडी सूं अणजाण

होळै-होळै

डांडी चालतो,

रैवै 
डांडी सूं अणजाण

किनारै-किनारै चालै

पण है बो अणजाण

आ कोनी जाणै कै

कठै टिब्बां

जिनावर मिलसी

कठै ढाणी

कठै पाणी मिलसी ?

होळै-होळै

डांडी चालतो

रैवै डांडी सूं अणजाण !

***