सुनील गज्जानी री कवितावां

भायला थूं सैर मती आइजे
भायला थू सैर मती आइजै 
सो की हर लेवै है मिनखा रो 
स्यात  इण वास्तै ओ सेर है 
अठै बड़ी बड़ी इमारता है 
लाम्बा -लाम्बा खेत नीं है 
अर नीं है रुंख रो  नांव 
भायला ! थूं सैर मती आइजै 
अठै  रा रैवासी 
केदियां जैड़ा जीवण जीवै है 
लेणा लागै है अठै रासण सू लेर 
झाझरू तांई री 
थूं गांव रो मोरियो है अर 
ए सगळा कागला है 
थारो हाल अठै पाणी बिण
मछली जैड़ो होवैला !
भायला ! थूं सैर मती आइजै !
सुण , अठै हवा नीं है ताज़ी 
फुटपाथ  माथै ई कटै है 
कईयां री रातां 
राज़ी री शोध मांय भूखा सोवै घणा ई 
जद कै गांव माय जिनावर भी 
खूंटी भी खूंटी ताणर सोवै है 
गांव माय मिनख अर अठै लोह बसै है 
स्यात थूं समझ गयो हुवैला 
गांव में संस्कृति है अर 
अठै सैर में चालै आथूणी बायरो 
भायला ! थूं सैर मती आइजै !

***