राज में आंवता ईज
राज में आंवता ईज
सरकारां आपरै विधायकां,मंत्रियां रो
कित्तो मान बधावै
केई न्यारी निरवाळी योजनावां लावै
जिणसूं वांरो चुनाव रो खरच
ब्याज समेत पाछो बिण जावै
राज
अर राज सूं जुड्या लोग
देस रै पसीनै री गाढी कमाई
इंया बिलै लगावै कै
आंख्या फ़ाटी की फ़ाटी रैय जावै
सगळां रा वारा न्यारा हूय जावै
लोकरां री छोडो,
फ़ट्या पुराणा गूद्डा, जूता तकात
नोटां अर पीळीयै सूं तिरीयामीरीया पावै
आखो देस रामजी री चिडिया हूय जावै
जिणरै ताबै लागै
दोनू हाथां
अणभांवतो खावै
रत्ती ई सरम नीं आवै
इत्तो खावै
फ़ेरुं ई
धाप नीं आवै
पण
जिण तांई स्सो कीं आवै
वो तो बापडो
उडीक में ईज
पूरो हूय जावै
जणै ईज तो
म्हारो भारत महान कहावै
***
पतियारो
जद टाबर हुवै बडा
टाबरां सूं बडा हूय जावै
बूढा
पण बूढा
कदेई नीं मानै
टाबरां नै बडा
अर
अपणै आपनै बूढा
टाबरां रै
बाप नै बी
टाबर ईज मानै
कुण समझावै आंनै
टाबर बी हुवै है बडा
नीं रैवै हरमेस टाबर
घणो नीं सई,
कीं तो पतियारो राखै आं पर...
***
आखरां री आंख सूं
म्हैं देखूं , थूं देखै, सैंग दिखै
अपणै आप नै, दूजां नै
इण भोम, आभै नै
पण कठै लख सक्या ओजूं तांई
जिणनै लखणै री हूंस जी में लियां
घडता, रचता रैवां
नूवां नूवां आखर
नित नूवां आखर
बिना सोच्यां विचारां
कुणसो है सांचो
अर मांयलो आखर
लगा न्हाक्यों अंबार
आखरां ईज आखरां रो
भेळो कर लियो आखरां रो
कित्तो ईज भाखर
लिखां इत्ता.....
भणां कित्ता?
म्हैं ईज इण पांत में
भेळा हूं सैंग सागै
म्हारै आखरां री आ भीड.
कांई कठे सूं बी कविता लागै??
म्हारी खेचळ,
सोधती रैवै दिनरात
कदेई न कदेई हूवैला पूरी साध
वै मांयला,सांचा आखर.
आवैला
म्हारी कलम रै हाथ...
***
किणरै माथै पाग
किणरै माथै पाग
किणरै आंख पाणी
किणरै होठां सांच
किणरै हिए है ताणी
एक सूं आगै एक
माथै पागां अनेक
कठै है सांची बळ्त
किण में सांचो रगत
कुणरै कन्नै मारग
कुण साधै’ला कारज
कीं तो कथ ए आस!
कुण आपांरो खास??
****
भायला
जद उणां सूंप्यो उणनै
मीठै पुरसारै रो धामो
बिचै री सैंग पंगतां डाकनै
वो पूग्यो ठेठ वीं पंगत
जठै उडीकै हा पुरसारै सारू उणरा
खासमखास भायला
भायला आखिर भायला हुवै
भायला नै बिसरायां किंया सरै
आडै वगत भायला ईज काम आवै
बडा बडा जीमणां में
भायला मिल जावै तो राम मिल जावै
भायला साथै जीमणै
अर
भायला नै जीमावणै में
खास आनंद आवै ।
***
जद उणां सूंप्यो उणनै
मीठै पुरसारै रो धामो
बिचै री सैंग पंगतां डाकनै
वो पूग्यो ठेठ वीं पंगत
जठै उडीकै हा पुरसारै सारू उणरा
खासमखास भायला
भायला आखिर भायला हुवै
भायला नै बिसरायां किंया सरै
आडै वगत भायला ईज काम आवै
बडा बडा जीमणां में
भायला मिल जावै तो राम मिल जावै
भायला साथै जीमणै
अर
भायला नै जीमावणै में
खास आनंद आवै ।
***
कोई टिप्पणी नहीं:
एक टिप्पणी भेजें