बाळू रेत
थांरो म्हारो न्यारो हेत
थूं मरधर मैं बाळू रेत
सूरजी रो तप, चांद उजाळौ
बादळ बूंद, नदी सूं नाळओ
एक बिना दूजो नीं सिरजै
लोप देख अंतस रो काळो
समदर सूं सीप्यां मत सेंत
थूं मरधर मैं बाळू रेत
सांस एक पण बीजी काया
जीव ब्रह्म सूं अळगी माया
भंवरां फूलां रै सगपण सूं
सौरभ रा अनुबंध सवाया
तोल मती हिवड़ै रो हेत
थूं मरधर मैं बाळू रेत
अकथ जातरा इण थळवत री
कुण जाणै पीड़ा पिणघट री
रीता घट नैणां जळ निठ्यो
नाद हुई गूंगी अणहद री
धोरां धोरां पसरियो हेत
थूं मरधर मैं बाळू रेत
***
कोई टिप्पणी नहीं:
एक टिप्पणी भेजें