आईदान सिंह भाटी री कवितावां

परमाणु रै पळकां बिचै 
आ धरतीधूसर माटी ।
रंग अलेखूं
परबत घाटी ।
धवळ-वेस मरजादा आळी,
जिण भुगती ही रातां काळी ।
उण माटी में,
उण आंगण में,
बुद्धां री करूणा लैराई,
महावीर अहिंसा अरथाई,
मोरपांख गीताजी गाई ।

उण माटी में
उण धरती में
व्याप गई ही अलख उदासी
बीखरगी ही पांख प्रेम री ।
अन्धकार हो सत्यानासी ।
मरजादा पग व्हिया पांगळा ।
मिनखपणै नै सुरसा गिटगी ।
डाकीचाळौ देस व्यापग्यौ ।
अन्धकार अंतस ऊतरग्यौ ।

गांव गरीबी
नागी नगरी
आदम रौ जायौ बण चकरी
आंख्यां सांमी
औढ गुलामी
अन्नदाता री जै जैकारां
करतां करतां जुग पळटाया ।
जीवण री आपाधापी में
कूड़ आखरां री कापी में
ऐक सबद आंखियां खोली ।
मिनख जूण रौ अरथ बतायौ ।
हींये विचाळै में साच जगायौ ।

वै आंख्यां अपणापै आळी
पत्तां-पत्तां,डाळी-डाळी
गांव-गौरवां/ओरण डांडी
रिनरोही,मगरा अर घाटी
नगर-नगर/अर सैहर सैहर में ।
बांध लंगौटी/हाथां लाठी
आभै अर धरती नै नापी ।
ओढ देह पै एक कपड़ो ।
बांध आप री कमर काठी।
साबरमती में सुर लैराया ।
सोरठ री आंख्यां अरथाया ।
मधरी-मधरी बोली बोली ।
डब-डब पांणी,करुण आंखियां
आज़ादी रो अरथ बतायौ ।

दसां दिसावां गूंजण लागी-
औ कुण आयौ ?
औ कुण आयौ ?
 मुळक-मुळक मनभांणी आंख्यां
 अपणापै री ऊजळ पांख्यां
 अंधकार नै उण जग वौकारियो ।

 उण गांधी सूं
 उण आंधी सूं
 सात सन्दर रा सिंघासण
 हळबळ-हळ्बळ करता आसण
 धूजण लागा ।
 गोरां आळी उण सत्ता नै
 संत नाप ली ऐक कदम सूं ।
 सत्य अहिंसा सूं ललकारिया ।
 उण वोकारिया अंधकार नै ।

 बम्ब री बळती लपटां में,
 गोळ्यां री ज़बरी झपटां में,
 दानवता री उण आंधी में,
 वै दौ आंख्यां-
 सूरज री साखां निपजादी
 लड़खड़ती लुळती काया में,
भारत भू रै हर जाया में,
भरदी वासंती आज़ादी ।

 उण बोलां सूं
 उण बाणीं सूं
गंगजमन री छौळां उछळी ।
 ब्रह्मपुत्र रौ वेग बदळग्यौ ।
 चम्बल रै पांणी बळखायौ ।
 सिंधु री लैरां अरथायौ -
 औ कुण आयौ ?
 औ कुण आयौ ?
आंधी अर बोळी जगती में
औ किणोरौ परचम लैरायौ ?
पंचनद री धारा अरथायौ-
औ कुण आयौ ?
औ कुण आयौ ?
 कृष्णकावेरी जस गायौ ।
औ कुण आयौ ?
औ कुण आयौ ?
छिप्रारेवा तट बरड़ायौ-
औ कुण आयौ ?
औ कुण आयौ ?

सात समन्दर धज सूं बोल्या-
औ म्हारौ उद्धारक आयौ।
काळी मानवता कुरळाई-
औ म्हारौ रुखवाळौ आयौ ।
भूखी आंतडि़यां अरथायौ-
औ म्हारौ अपणापौ आयौ ।
सदी बीसवीं वध नै बोली-
गांधी-आयौ/गांधी आयौ ।
आज उणी री पकड़्यां डांडी
बांध-बांध नै कमर काठी
झाल हाथ में उण री लाठी
उण वामनरी आ मानवता
भूखीनागी नाठी आवै-
अन्धकार री आंख्यां में खीरा उछाळती।
सिंघासण री दाढां बिच्चै हाथ घालती ।

उण गांधी नै/ उण वामन नै
आवण आळी अजरी पीढ्यां
आवण आळै अजरै जुग में
परमाणु रै पळकां बिच्चै
अंधकार
अर
इन्यावां बिच्च
अरथावैला
अपणावैला
गुणगावैला ।
***

कोई टिप्पणी नहीं:

एक टिप्पणी भेजें

Text selection Lock by Hindi Blog Tips