कमल रंगा री कवितावां

जतन
जोड़
आखर सूं आखर
घड़ूं सबद
ओळख रा
इण झाझै जतन
कदास
बचाय सकूंला
पड़ती मोळी
म्हारी साख
प्रीत
कविता
अर धरती.

***

उळथो
हरियल पानां
काठ तणै री सोभा
अंतस पीड़ रो
रूप संजीवण
उळ्थो ओ
रूप रो सरूप में

***

नीं जाणै क्यूं ?
आखै सैर में
पसरग्या समचार
गाभण रात
कर’र कूख खाली
नुंवै जलम्यै झांझरकै नै
छोडगी एकलो
नीं जाणै क्यूं ?

***

घुळ्गांठ
नीं खुली
थारै झाझै जतनां
उळ्झ्योड़ी
प्रीत री घुळ्गांठ
जाणै
जड़-चेतन री ग्रंथी
रची
स्रिस्टी रै सरुपोत में
आपां दोवूं मिळ’र ई

***

थारी भोळावण
सुपनां रै रंगां राच्योड़ी
बणी-ठणी थूं
कद बदल लियो भेख
ठाह ई नीं पड़ी
म्हैं तो अजैं ई ऊभो हूं
सागी भेख लिया
सागी उडीक
थारी भोळावण पाण

***