बुद्धिप्रकाश पारीक री कवितावां

गजल
सब का दोष बखाण भायला !
पण खुदनै मत जाण भायला !

जाण की नींद उडार चैन सैं
सो जा खूंटी ताण भायला !

पलकां मीच पळक लै मछळ्यां,
मत चूकै चौहान ! भायला !

किरकांट्या-सी रंग बिरंगी
छिब कुण सकै पिछाण भायला !

रावण ज्यूं हंस-हंस डकार जा,
रिसवत रूपी बाण भायला !

हरि को भजन पेट को धंधो,
कर समाज कल्याण भायला !

चकरासी जितरी चिमकासी,
या दुनियां छै साण भायला !

लोही तो आण छाण्यो पी जा,
पण पाणी ता-छाण भायला !

चमचा चमच्यां सैं रचवा लै
बुद्धिप्रकाश-पुराण भायला !
***

कोई टिप्पणी नहीं:

एक टिप्पणी भेजें

Text selection Lock by Hindi Blog Tips