लोटड़ी
आज म्हूँ सोचूँ
बीं गाँव नै
गाँव मं नै की आणी नै की जाणी
दुर्गादाणी घाल गी लोटड़ी मं पाणी
आज म्हूँ सोचूँ
बीं गाँव नै
गाँव मांय जौड़े नै
जौड़ै किनारे पीपळ नै
पीपळ रै डाळा नै
डाळां पर हिंडा नै
हिंडा पर छोरयां नै
उबळी मचावै
चूनी नीचे पड़ जावै
तीज गळै या ना गळै
रोळो मचावै एक काणी
अबै नै की आणी नै की जाणी
दूर्गादाणी घाल गी लोटड़ी मं पाणी
आज म्हूँ सौचूँ
बीं गाँव नै
गाँव री गळयां नै
गळयां मं टिंगरा नै
खेलै चिरम ठोलियो,
लूणीयां घाटी
लुक मिचाणी
हरदड़ो अर घूतो
लाला लिकतर दयूं क दयूं
पाछी घिर गुदी मं दयूं
हरयो समन्द्र गोपी चन्द्र
बोल मेरी मछली कितना पाणी
अबै नै की आणी नै की जाणी
दूर्गादाणी घाल गी लोटड़ी मं पाणी
आज म्हूँ सौचूँ
बीं गाँव नै
गांव रा तीज त्यौहार नै
होळी, दयाली, गणगौर नै
रंगा री पिचगारी नै
बीं मेळ मिलाप नै
बीं भाई चारै नै
छोटा न कोड स्यूं
मोटा न प्रणाम स्यूं
गळै लगांवता
एक दूजै रे घरे जांवता
स बांता करता स्याणी - स्याणी
अबै नै की आणी नै की जाणी
दूर्गादाणी घाल गी लोटड़ी मं पाणी
***
आओ म्हारा सांवरा....स्वागत है गोपी राम जी..
जवाब देंहटाएं